歐冠盃:利記再鬥波圖半和睇定食

利記再鬥波圖半和睇定食今晚另一場8強次回合，波圖返主場再鬥利物浦。攞住兩球優勢喺手嘅「紅軍」，最緊要唔好出現失波；波圖為保留晉級最後一線生機，初段亦唔想畀「利記」拎到作客入球，兩軍各有顧忌下，半場和捧得過。（無綫myTVGold800；Now644、有線602及662台周四凌晨3時直播）雙線爭冠要保留體力利物浦首回合靠拿比基達同羅拔圖法明奴嘅入波，技術性KO波圖，次回合就算輸1球都可以晉級4強，優勢極大，作客情況下相信「紅軍」初段會睇定啲嚟踢，盡量將個節奏拖慢。查實「紅軍」今屆歐聯4次作客只係取1勝3負，全部上半場從未試過領先對手，明顯入局較慢，加上佢哋剛喺英超2比0砌低車路士，繼續同曼城咬住上，雙線爭冠下最緊要識保留體力，今仗未必一開波就搶。主隊波圖有好消息，中堅比比及防守中場赫達靴里拉齊齊刑滿復出，中後場陣容完整番，不過佢哋班射手對住滴水不漏嘅「紅軍」防線，好難咬得入，加上球隊今屆4場歐聯主場有3次同對手開半場和，值得再追